அலங்காரக் கடை (Beauty Shop): மாதர்களது வெளித் தோற்றத்தை அழகுபடச் செய்யும் நிலையங்கள் மேனாடுகளில் இப்பெயரால் வழங்குகின்றன. அமெரிக்க ஐக்கிய நாடுகளில் மட்டும் இத்தகைய கடைகள் 60,000 உள்ளன என மதிப்பிடப்பட்டுள்ளது. தலை மயிரையும், தோலையும், கைகளையும், பற்களையும் அனைவரும் அழகு எனக் கருதும் வகையில் திருத்தி அமைப்பது இக்கடையில் நடைபெறும் வேலையாகும். அலங்காரப் பொருள்களைப் பயன்படுத்தும் கலை மிகத் தொன்மையானது. ஆனால் இதைக் கடைகளில் செய்யும் வழக்கம் இந்த நூற்றாண்டில் தோன்றியது.