நுண்ணுயிரிகளை ஒரு சில இயற்பிய, வேதி மாற்றத்திற்குட் படுத்தும் போது, அவற்றின் செல் கரைந்து விடுகிறது. இவ்வகைக் கரை நிலைக்கு, நுண்ணுயிர் கரை கொல்லி (bacteriolysis) என்று பெயர். இவ்வாறு மாற்றங்களை ஏற்படுத்தும் பொருள்களுக்கு, நுண்ணுயிர்க் கரை கொல்லி (erolytic) என்று பெயர்.வகை. நுண்ணுயிர்க் கரை கொல்லிகளைப் பல வகையாகப் பிரிக்கலாம். அவை இயற்பிய மாற்றங்கள் மூலம் கரைத்துக் கொல்லுதல், வேதி மாற்றம் மூலம் கரைத்துக் கொல்லுதல் என வகைப் படுத்தப் படும். இயற்பியல் மாற்றங்கள் நீரின் அதிக அழுத்தத்தின் மூலம் கரைத்துக் கொல்லுதல். இம்முறையில் அதிக அழுத்தத்திற்கு நுண்ணுயிரிகள் உட்படுத்தப் படுகின்றன அப்போது, செல்களில் உள்ள பொருள்கள் பிழியப் பட்டு, நுண்ணுயிரி உலர்ந்து விடும். பின்னர், அவை இறந்து விடுகின்றன. (அழுத்தம் 400–500 வ.ம.அ) திடீர் அழுத்தக் குறைவின் மூலம் கரைத்துக் கொல்லுதல். இம்முறையில் நுண்ணுயிரிகள் முதலில் அதிகக் காற்றழுத்தத்திற்கு உட்படுத்தப் படுகின்றன (3000 & 6000 psi). பின் திடீரெனக் காற்றழுத்தம் குறைக்கப் படும் போது, நுண்ணுயிரிகள் இறக்கின்றன. உறைய வைத்தலும்–நீர்த்தலும். இவ்வகை கையாளப் படும் போது, நுண்ணுயிரிகளை, நீர்ம நிலை யிலிருந்து திண்ம நிலைக்கும், திண்ம நிலையிலிருந்து நீர்ம நிலைக்கும் அடிக்கடி மாற்றுவதன் மூலம் கரைய வைக்கலாம். செவியுணரா ஒலி (ultrasonics). நுண்ணுயிரிகள் உள்ள நீர்மங்களில், இவ்வகை அலைகள் செலுத்தப் படும் போது, அவற்றின் செல்கள் உடைந்து விடும். இம்முறை பெரும்பாலும் பயன் படுவதில்லை. வேதி முறைகள். இம்முறைகளைக் கையாளும் போது, பெருங்கவனம் தேவை. பெரும்பாலான வேதி முறைகளில், நொதிகளும், புரத அமிலங்களும், ஒரு சில மருந்து வகைகளும் இன்றியமையாப் பங்காற்றுகின்றன. நொதி மூலம் கரைத்துக் கொல்லுதல். லைசோசைம் என்னும் நொதி நுண்ணுயிரில் செல்லில் உள்ள கார்போ ஹைட்ரேட்டுகளைக் கரைத்து விடுவதன் மூலம், நுண்ணுயிரிகள் அழிகின்றன. இந்த நொதி மனிதக் கண்ணீரிலும், சில சுரப்பி நீர்களிலும் பெருமளவு உள்ளது. நிரப்பி (complement). இது ஒரு வகைப் பகுதி எதிர்ப்பு பொருள் (partial antibody) ஆகும். இது, இயற்கையாகவே மனித உடலில் பெருமளவு உள்ளது. சீமைப் பெருச்சாளியின் குருதியில் இது மிகுந்து காணப் படுகிறது. இது நுண்ணுயிரினங்களின் செல் சுவர்களை உடைக்கும் ஆற்றல் பெற்றது. ஒரு சில புரத அமிலங்களும், நுண்ணுயிரிகளைக் கரைக்கும் கொல்லிகளாகச் செயல் படுகின்றன. மேற்பரப்பில் செயல் படும் நுண்ணுயிர்க் கரை கொல்லிகள் நுண்ணுயிரிகளின் புறப் பரப்பு இழு விசையைக் (surface tension) குறைப்பதன் மூலம், நுண்ணுயிரிகளைக் கொல்கின்றன.(எ-டு: சோப்பு) சல்ஃப்ஹைட்ரில் இணைப்பியாக விளங்கும் நுண்ணுயிர்க் கரை கொல்லிகள், செல் சுவரில் உள்ள டைசல்ஃபைடு இணைப்புகளை ஆக்சிஜனேற்றம் செய்வதன் மூலம், நுண்ணுயிரிகளைக் கொல்கின்றன. —ச. ஆதித்தன் துணை நூல். C.Lammana et.al., Basic Bacteriology. The Williams & Wilkins Company, Baltimore, 1975.